Moyra Daveyk (Toronto, Kanada, 1958) artelan ugari sortu du, 70eko hamarkadan lanean hasi zenetik. Hark sortutako piezak izen handiko hainbat museotan daude gordeta, adibidez New Yorkeko Arte Modernokoa eta Guggenheim Fundazioa, eta Londreseko Tate Modern.
Atzera-begirako erakusketa honek 80ko hamarkadatik aurrera sortutako lanak biltzen ditu, pieza zinematografikoak, argazkiak eta idazkiak barne direla. Bideoz egindako lanen artean, ‘i-confess’ (2019) berria nabarmendu behar da; bertan, gaur egungo Quebeceko egora soziopolitikoa aztertzen du Daveyk. Horrez gain, Artiumentzat berariaz egindako argazki-sorta ere egongo da ikusgai Gasteizen.
Argazkien artean, ‘Blue Ruin’ (2020) bilduma aipatu behar da. Hau ere Artiumentzat espreski sortutako argazki-sorta dugu, museoko langile eta kolaboratzaileekin izandako solasaldiak abiapuntu hartuta, autoreak ohi duen bezala.