Bilbo Museo Migrante Migrante (MMM) proiektuaren lehen geltoki bihurtu da egunotan. Angélica Dass argazkilari hispaniar-brasildarrak bultzatutako ekimen artistiko, ibiltari eta parte-hartzaile honek migrazioarekin lotutako memoriak bildu eta artxibo bizi bihurtzea du helburu. Itsasmuseumean maiatzaren 10era arte ikusgai egongo den proposamenak nazioarteko migrazioen, barne desplazamenduen, erbesteen eta itzuleren inguruko erretratuak, objektu pertsonalak eta testigantzak jasotzen ditu.

Proiektuaren aurkezpenean Jon Ruigómez Itsasmuseumeko zuzendariak, Iñigo Zubizarreta Bilboko Udaleko Giza Eskubide, Bizikidetza, Lankidetza eta Kulturartekotasun zinegotziak eta Angélica Dass artista eta MMM proiektuaren zuzendariak hartu zuten parte. Ekimenaren helburua da migrazioari buruzko kontakizunetan ohikoa den ikuspegi sinplifikatuaren ordez, entzutean, duintasunean eta bizipen aniztasunean oinarritutako espazio bat sortzea.

“Museo Migrante Migrantek migrazioaren inguruko diskurtso nagusiei bestelako begirada bat proposatzen die”, azaldu du Dassek. Proiektua hainbat belaunalditako pertsona migratzaileei zein migrazioarekin lotutako familia-historiak dituzten herritar guztiei zuzenduta dago. Oinarrian ideia argi bat dago: migrazioa ez dela salbuespenezko fenomenoa, gizakiaren izaeraren parte baizik.

Proiektuaren erdigunea itsas edukiontzi batean dago. Artxibo ibiltari, argazki-estudio eta erakusketa gune bihurtutako espazio horretan, Angélica Dassek parte-hartzaileen erretratu frontalak egiten ditu, baita balio emozional edo sinboliko handia duten objektuen argazkiak ere. Aldi berean, testigantza intimoak eta memoria pertsonalak jasotzen dira, etengabe hazten ari den artxibo bisual eta soinudun baten parte bihurtuz. Horrela, hiri bakoitzak memoria eta ahots berriak gehitzen dizkio museoari.

Bilbon egingo duen egonaldian hainbat jarduera antolatu dira herritarrentzat. Goizez, ikastetxeetako taldeek edukiontzia bisitatzen dute memoria, identitatea eta kultura-eskubideak lantzeko. Arratsaldez, berriz, publikoak Angélica Dassen argazki-estudioa bisitatu ahal izango du aurrez izena emanda, argazkilaritza, ahozko kontakizuna eta familia memoria uztartzen dituen esperientzia batean parte hartuz.

Solasaldiak

Egitarauaren une nagusietako bat maiatzaren 7an izango da, Museo Migrante Migrante: migrazioaren memoria mugimenduan solasaldiarekin. Itsasmuseumeko auditorioan egingo den topaketak artistak, ikertzaileak eta adituak bilduko ditu migrazioa gorputzen, objektuen eta kontakizunen bidez aztertzeko. Parte hartuko dute, besteak beste, Xingyi Lin Chen artista bisualak, María Gracia Cebrecos Loayza arkitektoak, Larraitz Zumeta ikertzaileak, Imanol Zubero soziologoak eta Blanchard Moussayou Sambouk.

Programazioa maiatzaren 9an amaituko da Orratz Begia / El ojo de la aguja. Gerrako umeak erakusketarekin lotutako tailer batekin. Jarduerak Gerra Zibileko euskal haurren erbestea eta gaur egungo migrazio esperientziak lotuko ditu, proiektuaren izaera pedagogiko eta belaunaldi artekoa indartuz.

Presentzia fisikotik harago, Museo Migrante Migrantek plataforma digital eleanitz batean jarraituko du hazten, bertan jasoko baitira hiri bakoitzean bildutako erretratuak, audioak eta objektuak. Bilboren ondoren, proiektuak Santander, Bartzelona, Malaga edo La Laguna bezalako hiriak bisitatuko ditu, memoria, bizikidetza eta kultura-eskubideen inguruko nazioarteko espazio bihurtuz.

Humanæ bezalako proiektuei esker nazioartean ezaguna den Angélica Dassek berriro erakutsi du artea topagune sozial eta hausnarketa kolektiborako tresna izan daitekeela, istorio pertsonalak ondare partekatu bihurtuz.