Zorionez, guztia ez dago asmatuta eszenako munduan. Eta bitxia bada ere, formularik beteranoetara ere jo daiteke zerbait berria sortzeko: musikara eta zirkuko tekniketara hain zuzen ere. Osagai horiei irudimena gehituz sortu du Coliflor Circo konpainiak 2011ko Leioako Umore Azoka irabazi zuen ikuskizun gozo hau, hainbat disziplinatan ibilitako nazioarteko artista multzoa elkartu duen proiektu bitxia.
‘Salir’ du izenburu zirkuaren eta antzerkiaren arteko erdibidean dagoen ikuskizunak. Protagonistak, Mini Compagnie (Frantzia) eta Belle Paubelle (Italia eta Txile) konpainietatik datozen zazpi nomadaz osatutako troupea. Akrobazia sinesgaitzak, dantza-koreografiak eta eszena bakoitzerako beren-beregi sortutako zuzeneko musika originala hartzen ditu oinarri kontakizunak, eszenatokia magiaz betetzeko.
Sarritan hain zaila gertatzen den elkarbizitzari buruzko istorioa aurkituko dute ikusleek, konta daitekeen modurik originalenean kontatua.