Uda iristen denean, kulturak ohiko aretoak utzi eta kaleak, plazak eta parkeak hartzen ditu maiz. Horixe da, hain zuzen ere, Uda Giroren funtsa. San Agustin Kulturguneak antolatutako zikloak beste urte batez Durangoko espazio publikoak sorkuntzarako eta kultur topaketarako gune bihurtuko ditu, herritarrak askotariko diziplina artistikoetara hurbiltzeko asmoz.

2026ko edizioak hamahiru jarduera eta ikuskizun bilduko ditu ekainaren 23tik irailaren 5era bitartean. Zirkua, antzerkia, musika, dantza garaikidea, haurrentzako zinema, magia, bertsolaritza eta performancea izango dira programaren osagai nagusiak. Jarduera gehienak aire zabalean egingo dira, kultur esperientzia herritarren eguneroko espazioetara eramanez.

Zikloari hasiera Zirko Txoskoren OH-PERA! ikuskizunak emango dio Otamotzena parkean. Umorea, antzerki bisuala eta zirku garaikidea uztartzen dituen proposamen horretatik abiatuta, uda osoan zehar askotariko emanaldiak izango dira, besteak beste magia, bertsolaritza, familia osoari zuzendutako ikuskizunak, kontzertuak eta dantza garaikideko piezak.

Programazioko une berezienetako bat uztailaren 2an iritsiko da. Egun horretan, Alaitz Muro artista durangarrak, Beñat Achiary musikari eta poetak eta Raúl García Etxeberriak inprobisaziozko performance bat eskainiko dute. Proposamena Durangoko Arte eta Historia Museoaren 40. urteurrenaren harira antolatutako jardueren barruan kokatzen da, eta diziplina artistikoen arteko elkarrizketa eta esperimentazioa izango ditu ardatz.

Arte eszenikoen alorrean, aipagarria izango da halaber GOTA ikuskizunaren presentzia. Txema Muñozek sortutako lanak FETEN sarietan Kale Ikuskizun Onenaren Saria jaso zuen eta Max sari baten irabazlea ere bada. Uztailaren 4an iritsiko da Durangora.

Irati Bilbao

Musikak ere protagonismo berezia izango du aurtengo edizioan. Botxo Boogies taldeak Juan Crisóstomo Arriaga omenduko du, eta, bestetik, Irati Bilbaok bere lan berria, Bloom, aurkeztuko du hainbat jatorri eta ibilbidetako musikariz osatutako talde batekin.

Familiei zuzendutako proposamenen artean izango dira Kayara, Inka Gerraria filmaren proiekzioa eta Hortzmuga Antzerkiaren Alonso, ezinezko mandatuen mezularia ikuskizuna, Aroa Blanco durangarraren parte-hartzearekin. Dantza garaikideak ere bere lekua izango du programazioan, Larrua Produkzioaken Sangre y Klorofila eta DAB Dantza Konpainiaren Kea lanekin. Bi piezek nortasuna, memoria eta kultura-paisaiarekin lotutako gaiak jorratzen dituzte.

Abuztuan zirkua eta antzerkia izango dira nagusi. Vaiven Zirkoaren Anónima ikuskizunak gizartean sarritan ikusezin bihurtzen diren pertsonak jarriko ditu erdigunean; Oskar Lu durangarrak, berriz, The Not-So-Green Man dantza-antzerki pieza aurkeztuko du, gizakiaren eta naturaren arteko harremana ardatz hartuta.

Zikloari amaiera irailaren 5ean emango zaio BarSanti konpainiaren Kodizia Late Night tragikomediarekin. Umore kritikoa eta telebistako gaueko saioen estetika baliatuz, osasun publikoaren egoerari eta aseguru pribatuen gorakadari buruzko gogoeta proposatzen du lanak.

Urtez urte, Uda Giro erreferentziazko hitzordu bihurtu da Durangoko udako kultur egitarauan. Arte eszenikoak eta musika espazio publikoetara eramanez, herritarren eta sortzaileen arteko topaketa sustatzen du, eta tokiko talentua zein kanpotik iritsitako proposamenak elkartzen ditu herriko kale eta plazetan. Horrela, Durango berriro ere aire zabaleko agertoki handi bihurtuko da uda honetan.