San Agustin Kultur Guneak udazkeneko denboraldiari ekingo dio irailaren 20tik Gabonak arte luzatuko den programazio zabalarekin. Guztira 19 ikuskizunek osatuko dute eskaintza, eta antzerkia, musika, umorea, dantza eta zirkua uztartuko dituzte. Denboraldi berriak kalitate artistikoaren eta proposamenen aniztasunaren arteko oreka bilatuko du, publiko askotarikoari zuzendutako egitarauarekin.

Udazkeneko berrikuntza nagusietako bat Ángel Martín umorista ezagunaren etorrera izango da. Somos monos ikuskizuna aurkeztuko du urriaren 12an eta 13an, Durangoko jaiekin bat eginez, eta emanaldi horiek izaera berezia izango dute, grabatu egingo baitira geroago emititzeko.

Antzerkiak protagonismo handia izango du berriro ere San Agustinen. Egitarauak proposamen sendotuak eta bestelako bide eszenikoak jorratzen dituzten lan berritzaileagoak bilduko ditu. Horien artean dago Jaime Figueroa bentrilokuoaren ikuskizuna, antzinakoa bezain harrigarria den teknika eszenikoa gaur egungo ikuspegitik berreskuratu eta umorearen zerbitzura jartzen duena.

Arte eszenikoek gaurkotasun handiko gaietara hurbiltzeko aukera ere emango dute. Ados Teatroak 52 hercios aurkeztuko du, bakardadearen inguruko lana; Histrión Teatrok, berriz, Disphoria ekarriko du, hainbat sari jaso dituen ikuskizuna, Alex gaztearen istorioaren bidez transexualitatearen gaia lantzen duena.

Euskarazko antzerkiak ere presentzia nabarmena izango du udazkeneko programazioan. Artedramak eta Axutek Nor naizen baneki ikuskizun berria aurkeztuko dute, identitatearen inguruko hausnarketa; sortu berria den Lolak Kolektiboa Zanbuila lanarekin iritsiko da, umoreari eta ikusleen barreak eragiteko asmoari helduz; eta Kepa Errastik eta Getari Etxegaraik Sidari ikuskizun berria aurkeztuko dute, estreinatu berritan.

Euskararen Egunaren inguruan, San Agustinek Gabriel Aresti Mug(h)arri hartuko du, Gabriel Aresti poeta bilbotarraren heriotzaren 50. urteurrena gogora ekartzeko sortutako proposamen eszenikoa. Gertuko antzerkiaren aldeko apustuak ere jarraipena izango du, eta Abadiñoko Banarte konpainia amateurra berriro igoko da San Agustineko oholtzara, oraingo honetan Cancún lanarekin.

Musika

Musika izango da denboraldiko beste ardatz nagusietako bat. Musika Eskola Bartolome Ertzillak antolatutako Musika Hamabostaldiaren barruan hautatutako proposamenek hainbat estilo eta ibilbide bilduko dituzte, eta, besteak beste, Anton Gómez musikari durangarra eta Judith Jáuregui pianista izango dira programazioan.

Udazken honetako berrikuntza esanguratsuenetako bat, ordea, opera bat lehen aldiz San Agustin Kultur Gunera iristea izango da. San Agustin Kultur Guneak eta Musika Eskola Bartolome Ertzillak elkarrekin antolatu eta finantzatutako proposamenak genero horretako obra bat espazioaren neurrira eta aukeretara egokitzeko helburua du.

Henry Purcellen Dido & Aeneas izango da aukeratutako obra, All'Antica musika-elkartearen eskutik. Dantza garaikideak ere izango du bere lekua, Eva Guerrero konpainiak Hasta el último baile ikuskizuna aurkeztuko baitu.

Txikienek eta familiek ere leku garrantzitsua izango dute udazkeneko eskaintzan. Lasala Danzaren Alaia Familian, Benetan Beren Bidutzi ikuskizun berria eta Maluta lanaren lau emanaldiak izango dira publiko familiar eta gazteenari zuzendutako proposamenetako batzuk. Azken horiekin emango zaio amaiera urteko programazioari San Agustin Kultur Gunean.

Paule Sánchez Astarloa Kulturgintzako buruak eta Kultura zinegotziak nabarmendu duenez, udazkeneko programazioaren helburua San Agustin «kultur gune bizia, irekia eta askotarikoa» izaten jarraitzea da, hainbat lengoaia artistikok, publikok eta sentsibilitatek lekua izango duten espazioa. Haren hitzetan, kalitate eta aintzatespen handiko proposamenen eta «berritzaileagoak, bereziagoak eta arriskutsuagoak» diren beste batzuen arteko oreka bilatu dute, ikusleek arte eszenikoak bizitzeko modu berriak ezagutzeko aukera izan dezaten.

Sánchezek azpimarratu du programazioak hiru konpromiso nagusiri eusten diela: euskarazko sorkuntzari, tokiko artistei babesa eta ikusgarritasuna emateari eta familiei zein publiko gazteenei zuzendutako kultur eskaintza sustatzeari. Helburua, azken batean, San Agustin Durangoko herritarrak kulturarekin elkartzeko eta kulturaz gozatzeko gunea izatea da, eta, aldi berean, bestela ezagutzeko aukerarik izango ez luketen proposamenetara hurbiltzeko aukera eskaintzea.