Informazioa berehala eskuratzeko aukera gero eta handiagoa den garai honetan, Jakingura Jaialdiak bestelako gonbidapena egiten du: galdera hobeak formulatzeko denbora hartzea. Hori da Kutxa Fundazioak bultzatutako ekimen honen ardatza. Azken asteetan Gipuzkoako hainbat tokitan garatu den programak zientzia, kultura, jasangarritasuna, sormen artistikoa eta gaur egungo gizarte-gaiak uztartu ditu, jakin-minaren balioa erdigunean jarriz.

Jaialdiaren azken jardunaldia ekainaren 19an egingo da Tabakaleran. Donostiako kultura-zentroa ezagutza partekatzeko, hausnartzeko eta esperimentatzeko gune bihurtuko da egun horretan. Arratsaldeko lehen orduan familiei zuzendutako tailer bat egingo da, eta ondoren, jarduerak Tabakalerako patioan jarraituko du, jaialdiaren espiritua hobekien islatzen duten bi proposamenekin.

Lehen hitzordua 18:30ean hasiko den zuzeneko podcasta izango da. Ainhoa Vitoria eta Aitziber Grados komunikatzaile eta dibulgatzaileek gidatuko dute saioa, eta hiru gonbidatu izango dituzte lagun: Olatz Salvador musikaria eta konpositorea, Jon Kareaga ingurumen-aktibista eta Javi Rivero sukaldaria.

Parte-hartzaileen profil anitzek jaialdiaren beraren izaera islatzen dute. Musikaren, ingurumenaren eta gastronomiaren ikuspegietatik abiatuta, jakin-minak beren ibilbide pertsonal eta profesionaletan izan duen eraginaz arituko dira. Sormenaz, behaketaz eta pentsamendu kritikoaz ere jardungo dute, bakoitzak bere jardun-esparrutik.

Esplorazio-ariketa Dejabu konpainiarekin

Ordubete geroago, 19:30ean, Dejabu konpainiak hartuko du lekukoa Paisaia entseguak. 01 esperimentua lanarekin. Ander Mujika, Edorta Subijana eta Maria Izquierdoren laguntzarekin sortutako proposamenak paisaiari eta ingurunearekiko harremanari buruzko begirada berriak proposatzen ditu. Ikuskizun tradizional bat baino gehiago, partekatutako esplorazio-ariketa gisa aurkezten da, ikusleak bere ingurua beste modu batean behatzera gonbidatzeko.

Proposamen horrek lotura estua du Jakinguraren filosofiaren oinarri diren ideiekin. Dejabuk urteak daramatza ikerketa, esperimentazioa eta lurraldearekiko harremana ardatz dituzten proiektu eszenikoak garatzen. Kasu honetan ere, artea eta hausnarketa uztartzen dituen laborategi ireki baten moduan planteatzen da, erantzun itxiak eman baino gehiago galdera berriak sortzeko asmoz.

Amaierako jardunaldi honekin, Kutxa Fundazioak jakin-minaren inguruko elkarrizketa sozial eta kulturala sustatu nahi duen ekimen bati emango dio amaiera. Ziurtasun azkarren garaian, Jakingurak zalantza, entzutea eta esplorazio partekatua aldarrikatzen ditu. Azken finean, mundua beste begi batzuekin ikusteko gonbidapena da, eta gogorarazten du galderarik interesgarrienek bide berriak ireki ohi dituztela.