Genero gutxi dira nesken rockabillyak duen erreferentzia argi eta begibistako honen parekoa dutenak. Kantari estatubatuarra itsasargia izan da 1954an taula gainean hasi zenetik. Generoaren erregina eta andre gorena. Areago, Jack Whitek ‘The party ain’t over’ diskoaz bir-bultzatu zuenetik.
74 urteko adina eta mitoaren zamaz gain, Wanda Jackson-ek ahotsa fresko mantentzen du. Hank Thompson kantariak deskubritu zuen Oklahomako irrati batean, 50eko hamarkadaren erdialdean. Debuta zirraragarria izan zen, eta handik gutxira Elvis Presley, Jerry Lee Lewis eta Buddy Holly gisako mitoekin birak egin eta rockabillyko ikonoaren lorratza marrazten hasi zen. Oldie giroko ikuskizuna izango da, baina revivalismo hutsaren berniz artifizialik gabekoa, XXI. mendean berpizten eta bizirik irauten jakin duen aitzindari baten benetako kutsuaz betetakoa. Horretarako, 'The party ain't over' disko distiratsu eta liluragarria dakar, soul eta countryaren oihartzunez eta Dylan, Amy Whinehouse eta Jimmie Rodgers bezalako lagunen moldaketez osatutakoa. Metala eta teklatuen moldaketa gazteek sendotzen dute, eta gitarra zorrotzek Jack White ekoizle eta White Stripesen sortzailearen nortasuna bistaratzen dute. 'Fujiyama mama' gisako doinuen laguntzaz, oroitzeko moduko gaua izango da.
Segur aski asko interesatuko zaizu...
