Emma-Jean Thackray (ahotsa, gitarra), Dougal Taylor (bateria), Lyle Barton (teklatuak), Matthew Gedrych (baxua)

groove kutsakorrak

Emma-Jean Thackray artista britainiar bat da, jatorriz Leedsekoa, bere musika-jarduna bizi- eta adierazpen-esplorazio bihurtu duena. Thackray funtsezko artista bihurtu da egungo musikan, eta multinstrumentista, konpositorea, ekoizlea, abeslaria, DJa eta taldeko liderra da. Bere obra haize kontra sortu du, generoen arteko oztopoak apurtuz eta jazza, funka, soula, popa, grungea, housea eta technoa integratuz, sormenez betetako hizkuntza musikal propio batekin.

Thackray langile-klaseko familia batean jaio eta hazi zen, eta haurtzaroan hasi zuen bere musika-ibilbidea, instrumentuekiko eta soinuarekiko harreman iraunkor bati hasiera eman zion korneta batekin. Erakutsi zuen birtuosismo goiztiarraren ondorioz, tronpeta-jotzaile nagusia izan zen Yorkshireko hainbat taldetan. Geroago, Londresera joan zen jazz-ikasketekin jarraitzeko asmoz, hasieran Royal Welsh College of Music and Drama izenekoan, eta geroago Trinity Laban Conservatoire of Music and Dance izenekoan.

Lehen urratsak Walrus (2016) EParekin egin zituenetik Erresuma Batuko ahotsik berezienetako bat izatera iritsi arte, soinuarekiko jakin-minean eta osotasun artistikoan oinarritutako ibilbide bat osatu du Emma-Jeanek. Bere estreinako Yellow (2021) diskoa bere Movementt izeneko konpainiaren bitartez kaleratu zuen. Disko horrek Jazzaren eta musika sortzailearen esparruko begiraden erdi-erdian kokatu zuen Emma-Jean, eta lehen postura iritsi zen Britainia Handiko jazz musikako zerrendetan.

Bigarren diskoa, Weirdo (2025), unibertso artistiko eta pertsonal horren hedadura ausarta da. Diskoa Londresen duen etxebizitzan idatzi eta grabatu zuen, eta proiektua neurodibergentziari (autismoari eta ADHN-ari) buruzko gogoeta intimo baten eta bere bikotekidea 2023an hil ondorengo doluaren ondorioz sortu zen. Diskoa erabateko kronika emozionala eta soinu-kronika da, eta umorea, mina, amorrua, introspekzioa, ospakizuna eta erresilientzia uztartzen dira bertan.

Weirdo diskoan, Thackrayk instrumentuak, ahotsa eta testurak erabiltzean agertzen duen sakontasunak agerian uzten du, bere teknika ez ezik, musikarekin duen bizi-konpromisoa ere bai. Hainbat artistarekin (hala nola Reggie Watts-ekin eta Kassa Overall-ekin) egindako kolaborazioek adierazpen-komunitatearen ideia hori handiagotzen dute, baina ardatza bere ahotsa da oraindik: ahots beroa, intuitiboa, zorrotza.

Thackrayk, konposatzeaz eta jotzeaz gain, proiektu guztiak produzitu, moldatu, nahastu eta zuzentzen ditu bere ikuspegi propioarekin, eta, hori dela eta, The Guardian egunkariak adierazi du soinu-tradizioak eta soinu-iraultzak artifiziorik eta aurreiritzirik gabe batu ditzakeen ?musika-eruditua? dela. Thackrayren erreferentziak askotarikoak dira: George Clinton, Meshell Ndegeochello, Louis Cole, Prince, Kurt Cobain, Steely Dan, Robert Glasper, Kate Bush, Björk...

Horrez gain, DJ eta komunikatzaile gisa ere nabarmentzen da. Irrati-programetan parte hartzen du, eta askotan agertzen da hainbat irratitan, hala nola BBC 6Music eta Worldwide FM izenekoetan. Programa horietan, musika hautatzeko garaian agertzen duen sentsibilitatea bere diskurtso artistiko propioarekin osatzen du.

Thackray indar sortzailea da, Britainia Handiko musikaren esparruko pertsonarik moldaerraz eta berezienetako bat, energiaz eta publikoarekiko loturaz betetako indar eszenikoa duen artista. Thackrayren historia arbuioa, desberdintasuna eta galera musika guztiz gizatiar bihurtu dituen sortzaile batena da; musika horrek, soinua egitera mugatu gabe, bizitzaren beraren konplexutasuna konektatu, zalantzan jarri eta goretsi egiten du.