Lehiakideen artean izan ziren, besteak beste, EZEZEZ taldea (Karramarroa), Mirua (Miruenea), Olaia Inziarte (Zerrautsa dela) eta Ruper Ordorika (Lurra ikutu barik), euskarazko musikaren aniztasuna eta maila altua erakutsiz.

Duela urtebete argitaratutako ZULOA diskoak atmosfera eder eta goibela eraikitzen du, minari aurrez aurre begiratzeko eta doluaren ertz guztiak zeharkatzeko gonbita eginez. Hamar kantuz osatutako lana da, katebegi moduan lotuta, entzuleari bai babesleku bat eskaintzen diona —iluntasunean murgiltzeko— bai ihesbide bat —kanpoko argi printzak jarraituz ateratzeko—.

Diskoaren ekoizpena taldeak berak hartu zuen bere gain, JEWLNen gidaritzapean, eta nahasketa zein masteringa Ed is Dead-ekin landu zituzten. Elektronika eta punka uztartzen dituen soinua da, tentsio emozional handikoa, garaikidetasunarekin eta barne munduarekin lotura estua duena.

Ibilbide sendoa eta nazioarteko proiekzioa

2020an sortua, Merina Gris Sara, Julen eta Paskalek osatzen dute. 2022an kaleratutako lehen lanarekin, Zerua Orain, berehala piztu zuten arreta, eta diskoa urteko onenen artean kokatu zuten hainbat hedabidek. Hasierako kontzertuak berehala agortu ondoren, ibilbide sendoa egin dute estatuko zein nazioarteko eszenan.

Taldea jaialdi garrantzitsuetan aritu da, hala nola Bilbao BBK Live, Primavera Sound edo Mad Cool, baita nazioarteko hitzorduetan ere, esaterako Eurosonic Noorderslag edo Iceland Airwaves.

Zuzeneko indartsua eta nortasun berezia

Taldearen zuzenekoa da bere indargune nagusietako bat. Energia, tentsioa eta emozioa uztartzen dituen proposamena da, non indarkeria eta samurtasuna eskutik doazen, eta publikoarekin lotura zuzena sortzen duen.

MIN sarietan jasotako aitortzak berresten du Merina Gris euskal eszenako proposamen interesgarrienetako bat dela gaur egun, eta bere musika —intimoa bezain bortitza— gero eta publiko zabalago batera iristen ari dela.