Aldi baterako zazpi erakusketak eta Bildumaren aurkezpen berritu batek osatzen dute egutegia, Bigarren Mundu Gerraren osteko artearen mugarriak gaur egungo kezkekin elkarrizketan jarriz. Martxoaren 19an abiatuko da urtea Ruth Asawa: Atzerabegirakoa erakusketarekin: Estatuan artistari eskainitako lehen erakusketa handia, jaiotzaren mendeurrenarekin bat. Alanbrea bezalako material xumeak erabiliz, Asawak forma organiko eta poetikoak sortu zituen, arte-hezkuntzaren eta eskubide zibilen aldeko konpromisoarekin bereizi ezinak.

Maiatzean, museoak bere in situ saila aktibatuko du Igshaan Adams artistaren eskutik: gorputza, dantza eta ehungintza memoria kolektibo gisa ulertzen dituen instalazioak museoaren espazioa zeharkatuko du. Hilabete amaieran, Jasper Johns: Night Driver atzerabegirakoak zazpi hamarkadatan zehar egindako ibilbide erabakigarria berrirakurriko du, espresionismo abstraktutik arte kontzeptualera doan trantsizioa argituz.

Udazkenak mugimendudun irudiari emango dio protagonismoa. Pipilotti Risten Ever Is Over All bideoinstalazio ikonikoak eguneroko indarkeria keinu poetiko eta askatzaile bihurtzen du. Ondoren, Steve McQueen artistaren instalazioak ikuslearen gorputza eta pertzepzioa esperientzia fisiko gisa jarriko ditu erdigunean.

Minimalismoa

Azaroan, Dan Flavini eskainitako erakusketa handiak minimalismoaren oinarriak berriro definituko ditu argiaren bidez. Urtea ixteko, Zadie Xa artistaren in situ proposamenak mitologia, identitatea eta zientzia-fikzioa uztartuko ditu ingurune murgiltzaileetan.

Urte osoan zehar, museoko Bilduma —2025ean berritua— ibilbide honen atze-oihal izango da, gerraosteko artearen funtsezko lanekin. 2026an, Guggenheim Bilbao Museoak ez du soilik izen handien erakustokia izan nahi: begiratzeko moduak zalantzan jartzeko espazioa ere bada.