48. Durangoko Azoka euskarazko zinema, dokumental eta telebista ekoizpenaren fruiturik nabarmenenen erakusleiho erraldoia bilakatuko da aurten. Ekitaldiz betetako hiru egun izango dira, abenduaren 5ean Ikasleei zuzendutako bikoizketa-tailer sortarekin hasiko direnak.

Hilaren 6 eta 7an, Durangoko Zugaza Zinemak etengabeko proiekzioak hartuko ditu 11.00etatik 20.00ak arte. Programatutako lanen egileekin hitz egiteko aukera izango dute bertara hurbiltzen diren ikusleek.

Bi jardunaldi horietako lehena 'Euskara jendea' dokumentalaren proiekzioarekin (12.00) hasi eta  'Goenkale. Help! Socorro! Lagundu! TV movie-arekin amaituko da. ETBko telesaioaren hogeigarren urteurrena dela eta grabatu dute film hori.

Azken eguna hautatutako bideoklip sorta batekin eta Goizalde Landabaso kazetariak gidatuko duen mahai-inguruarekin hasiko da.  Film laburrak atariko egokia izango dira arratsaldea beteko duen etengabeko proiekzioetarako, 'Amaren eskuak' eta 'Emak bakia' pelikulekin itxiko direnak.