Azkuna Zentroa – Alhóndiga Bilbaok irailaren 24an emango dio hasiera eszenAZ 2026-2027 arte bizien denboraldiari Despoblados lanarekin. Proyecto Villalacrek sortutako proposamenak landa-munduaren memoria, galera eta abandonua jorratzen ditu, hitza, musika eta antzerkia uztartuz. Emanaldia Auditorioan izango da, 19:00etan.

Proyecto Villalacre sorkuntza garaikideko kolektiboak musika, zinema eta arte eszenikoak gurutzatzen dituen praktika artistikoa garatzen du Burgosko Merindadeetatik, lurraldearekin lotura estua izanik. Despoblados lanean interprete batek eta bost musikarik Andrés Martín Domínguez idazle sorianoaren testuetan oinarritutako paisaia poetiko eta soinuzkoa eraikitzen dute zuzenean.

Lana desagertzen ari den landa-mundu batean kokatzen da, eta musikaren eta hitzaren bidez errealitate horren hainbat alderdi erakusten ditu: malenkonia, tristura, maitasuna, gogaitasuna, ulertezintasuna eta haserrea. Desagertzera kondenatutako nekazarien kultura baten memoriari eta hura bizi izan zutenengan geratzen diren arrastoei begiratzen die ikuskizunak.

Eszenan emakumezko pertsonaia bakarra ageri da, izenik gabea eta denboraz kanpokoa, lurrari lotua eta, aldi berean, desagertzera kondenatutako errealitate baten behatzailea. Poesiaren bidez, landa-ingurune horretan bizitakoa gogoratzen du, haren balioak aldarrikatzen eta haren edertasuna ekartzen ditu gogora, baina baita alde mingarri eta negatiboenak ere, gordinki. Pertsonaiak fisikotasuna, adierazpen poetikoa eta mugimendua uztartzen ditu, eta zuzeneko musikaz lagunduta dago une oro.

Testu bakoitzerako berariaz konposatu da musika, eta obra osoaren zerbitzura dagoen unitate gisa ulertzen da. Emaitzak musika garaikidea, elektronika eta elektroakustika uztartzen ditu, publikoak erraz ezagut ditzakeen eta antzerki- zein zinema-musikatik hurbil dauden melodiekin. Pianoak, saxofoiak, biolinak, kontrabaxuak eta perkusioak osatzen dute interpreteari laguntzen dion musika-taldea.

Despoblados lurretik sortutako lana da, eta Proyecto Villalacreren arabera, memoriatik «jada ez dagoenak uzten duen itzalera» hurbiltzeko beharrari erantzuten dio. Lanak hutsune hori sorkuntza artistikorako abiapuntu bihurtzen du, eta bizimodu eta lurralde baten galerari buruzko hausnarketa proposatzen du. Aienea, nahasmendua eta gainbehera asaldurarekin eta itxaropenerako dei batekin batera agertzen dira.

Praktika eszenikoak eta sorkuntza garaikidea eraldatzen ari diren lengoaia berriak

Despoblados lanarekin, Azkuna Zentroak egungo praktika eszenikoetan eta sorkuntza garaikidea eraldatzen ari diren lengoaia berrietan arreta jarriko duen eszenAZ denboraldi berriari ekingo dio. 2026-2027ko programak bertako, estatuko eta nazioarteko artisten proposamenak bilduko ditu, eta arreta berezia eskainiko die memoria, identitatea, teknologia eta eraldaketa sozialei. Lurraldea, botere-egiturak, desberdintasunak, askatasuna eta kontakizun kolektiboen eraikuntza ere hainbat lanen ardatz izango dira.

Despoblados lanaren ondoren, urriaren 8an jarraituko du programazioak Alberto Velascoren SACRESIZE lanarekin. Proposamen koreografiko horrek gorputz potoloak jartzen ditu eszenaren erdigunean, dantzako edertasun-estandar tradizionalak zalantzan jarriz. Urriaren 29an, berriz, Olatz Gorrotxategiren 43º13 "44" N helduko da, Domingo Gangoitiren 1937ko desagerpenetik eta haren inguruko familia- eta memoria kolektibotik abiatutako antzerki dokumental eta performatiboko pieza.

Denboraldiaren lehen zatian izango dira, halaber, La Intrusaren Este himno llevará la palabra euforia, Dantzaldiren barruan aurkeztuko den sorkuntza berria; La Virgueriaren King Kong Teoría, Virginie Despentesen testuaren egokitzapen eszenikoa; eta María Marínen Las Tres Marías, flamenko garaikideko proposamena. Azken horrek itxiko du programazioaren lehen zatia abenduaren 17an.

Ikuskizunetarako sarrerak salgai daude Azkuna Zentroaren ohiko kanalen bidez, eta aldez aurreko salmentan % 50erainoko deskontuak eskaintzen dira.