Osasun larrialdiaren ondorioz ateak itxi behar izan zituenetik hiru hilabete eta bost egun igaro ondoren, Arriaga Antzokia ateak zabalduko ditu berriro. Joaquin Achucarro piano-jotzaile bilbotar handiari egokitu zaio eta fase berri honetako lehen emanaldia eskaintzea. Egun horretatik aurrera, 19 emanaldi programatu dituzte uztailaren 23ra arte, Bilbao Uda 2020 ekimenaren barruan, antzokiko langileen eta ikusleen segurtasuna bermatzeko protokolo zorrotza erabiliz. Besteak beste, aurrez aukeratutako 246 eserleku jarriko dira salgai gehienez, uneoro pertsonen arteko distantzia gordetzeko.
Egitarau berria bertako ekoizpenaren aldeko apustu garbia izango da. Asier Polo txelo-jotzailea, Jone Martinez sopranoa eta Maite Marruri mezzosopranoa arituko dira besteak beste musikaren atalean. Horrez gain, antzokiko zuzendari artistiko Calixto Bieitok zuzendutako Gabriel Arestiren etxea defendituko dut (uztailak 9) poesia ikuskizuna nabarmendu behar da. Beste izen handi batzuk igaroko dira Arriagako agertokitik, adibidez, Gurutze Beitia aktorea, Lucia Lacarra dantzaria eta Bernardo Atxaga idazlea.
Antzerkiari dagokionez, Ez dok Hiru ikuskizunaren bertsio akustikoa eskainiko dute Patxo Telleria eta Mikel Martinez antzezleek; eta Hoy ultima función gaztelaniazko lana Itziar Lazkanok eta Ramon Bareak.
Sarrera guztiak 15 eurotan salduko dira eta hiru ikuskizun ikusteko bonuak ere jarriko dituzte salgai, 30 euroko prezioarekin.