Antzerkia, dantza, zirkua eta poesia bisuala. Hori guztia aurkituko dute ‘Ilargiaren bi aldeak’ ikustera hurbiltzen direnek; ume, gazte zein helduek, haiei guztiei zuzenduta dago-eta Hika konpainiaren ikuskizun berria.
Eszenatokian ilargiaren alde banatan bizi diren bi lagun antzeztuko dituzte Miren Gaztañaga eta Amaia Pascual aktoreek. Bata gerretara jolastuz dibertitzen da; besteak gerraz ahazteko jolasten du. Bi munduak lotuz, horri guztiari ukitu poetikoa ematen dioten zuzeneko akrobaziak, Maider Yabar aktore-akrobatak eginak . Azkenik, DJ Makalaren musikak erritmo biziz hornitzen du ikuskizuna.
“Oinarria da hain bortitzak diren joko birtualen aurkako oihua”, dio muntaiaren zuzendari Agurtzane Intxaurragak. “Espektakuluak denetarik dauka: umorea, une gogorrak eta akrobatak ematen dion ukitu poetikoa”, gaineratu du.
Guztia prest dago, beraz, ilargiaren bi aldeetara bidaiatzeko.