Rock and rollaren unibertsoak Nashvilletik datorren hau bezalako taldeak behar ditu. Argazkian dotore irteteak, modernitate-itxura emateak edo esperimentuak egiteak arduratzen ez dituen musikariak. Wez Traylor, Zack Martin, Seth Murray eta gainerakoak bezalako jendea, amerikar sustraiaren hauts sakrosantuan jolasean ari direnak. Ez dira batere 'hipster'-ak agian, baina hori da beraien argia, XXI. mendean birsortzea fokuak Mendebaldeko kostalde yankian eta hippyen garaian jartzen dituzten soinuak.
Taldea 2009an sortu zen, hirukote formatuan, eta bost urte geroago lau album argitaratu dituen boskotea dugu. Berria, 'Dancin' with wolves', bere ondarearen eta kezken erakusgai mamitsua; roots rocka, rock and rolla, alt country-a, boogie-a, hegoaldeko oihartzunak eta psikodela-tantak darizkien hamar kantu. Cowboy-kantuei egindako begi-keinuak ere badaude, pedal steel guitar, organo eta aho-soinu moldaketa sakonekin batera. Sekulako gozamena. Ez da kasualitatea Leon Russell-i izugarri gustatzea.