Atlantikaldiak irailaren 17tik 20ra hartuko ditu berriro Errenteriako kaleak, plazak eta hainbat gune, 13. edizioarekin. Aurtengo jaialdiak «Uhinak» lema hartu du ardatz, itsasoaren mugimendutik harago soinua, energia, transmisioa eta topaketa irudikatzen dituen ideia baten inguruan. Errenterian sortutako eta kanpotik iritsitako kultur korronteak elkartzeko asmoarekin, Atlantikaldiak musika eta bestelako hizkuntza artistikoak herritarren parte-hartzearekin uztartuko ditu.

Edizio honetako egitaraua joan den astean aurkeztu zuten Aizpea Otaegi Errenteriako alkateak, Maite Gartzia Kultura zinegotziak eta Isaac Palencia Gipuzkoako Foru Aldundiko Kultura eta Gazteria zuzendari nagusiak, jaialdia osatzen duten eragileetako ordezkariekin batera. Aurkezpena Agirre Lehendakariaren plazan egin zen, aurtengo programazioaren erreferentzia nagusietako bat izango den Itsasargi Nagusia kokatuko den lekuan.

Itsasargiaren irudiak zentzu berezia hartuko du aurten. Jaialdiaren agertoki nagusiak argia emateko, orientatzeko eta elkargune izateko funtzio sinbolikoa hartuko du, «Uhinak» kontzeptuarekin lotuta. Uhin batek abiapuntu bat izan arren bidean hedatu eta beste batzuekin elkartzen den bezala, Atlantikaldia ere Errenteria eta kanpoko kultur sorkuntzen arteko gurutzagune gisa ulertzen da.

Jaialdiak lau gune nagusi izango ditu. Lehendakari Agirre plazako Itsasargi Nagusia izango da programazioaren agertoki nagusia; Herriko Plazak hurbileko emanaldiak hartuko ditu; Panier orubeko Kalekaia arte urbanoari eskainiko zaio; eta Foru plazako Herrixkak jarduera parte-hartzaileak eta gastrogunea bilduko ditu. Musika izango da egitarauaren ardatzetako bat, baina kaleko jarduerak, bisita gidatuak, tailerrak, gastronomia eta topaketak ere izango dira protagonista.

Jaialdirako propio sortutako musika-topaketak

Atlantikaldiaren nortasun berezienetako bat diren Itsas Elkarrizketek berriro elkartuko dituzte jatorri eta ibilbide askotariko artistak, jaialdirako propio prestatutako emanaldietan. Itsasargi Nagusiko oholtza gainean La Mòssa Besaiderekin ariko da; Les Frères Smith, Lide Hernandorekin; Baiuca, Oreka TXrekin; Selma Uamusse, Enekorarekin; eta Macaco, Sünerekin.

Musika-programazioa Errenteriako beste guneetara ere zabalduko da. Herriko Plazan Nhil, Mon Dvy, Argentinatik Euskal Herrira Folkean, Del Val, Carla Delgado eta Taghufi ariko dira. Herrixkan The Soulanders, Triporters eta Txorinho izango dira, eta Kalekaian, berriz, Azkura, Zaunka, Sedientos de Cumbia, Mamba System, Mr. Luken, Vazkez eta Siwanaba.

Herri Arte Eskolak ere parte hartuko du aurten, Konexio bretainiarra ekimenaren bidez. Proiektuak Bretainiarekin eraikitako lotura artistiko eta kulturala eramango du Atlantikaldiara, jaialdiak tradizioen, lurraldeen eta sorkuntza garaikidearen arteko harremanei ematen dien garrantzia berriro agerian utziz.

Programazioak bestelako esperientziak ere eskainiko ditu: bisita gidatuak, Paddle Surfa, An(h)iztunak Giza Liburutegia eta Sukaldian kulturarteko sukaldaritza tailerra, besteak beste. Jarduera batzuetan parte hartzeko izen-ematea dagoeneko zabalik dago, eta egitarauaren xehetasun guztiak jaialdiaren webgunean kontsulta daitezke.

Atlantikaldia, ordea, ez da soilik kontzertuen eta agertokien bilduma. Jaialdiaren atzean kultur eragileek, elkarteek, sortzaileek, ostalaritzak, merkataritzak, ikastetxeek, kirol elkarteek, gastronomia-elkarteek, erakundeek eta herritarrek osatutako sare zabala dago. Izaera kolektibo horrek eman dio urteotan bere nortasun berezia, Errenteria musika, kultura eta hizkuntza artistikoen topagune bihurtuz.

Aurten, beraz, Atlantikaldiak itsasargia piztu eta uhinak zabaltzeko gonbita egingo die herritarrei eta bisitariei. Lau egunez, Errenteriako plazak, kaleak eta ibaia kulturaren eta topaketaren eszenatoki bihurtuko dira, jaialdiak bere sorreratik landu duen ideia bati jarraituz: kultura partekatzen denean, haren oihartzuna urrunago heltzen dela.