Kulunka konpainiak alzheimerrari heldu dio antzezlan hunkigarri honetan, keinuzko antzerkia eta maskarak erabiliz. Dramatismoan jausi gabe, bizitzaren egoera guztietan egon daitekeen itxaropena erakusten du.
‘Andre y Dorine’ eszenatokian tarteka aurkitzen den perla txiki horietako bat da. Hizki larriz idazten den maitasunari buruzko istorio hunkigarria; gaztetasuna aspaldi joan arren irauten duen maitasuna, Alzheimer-ez mozorrotutako ahanzturak aurretik eraman nahi badu ere. Hori guztia Andre Gorz filosofoaren ‘D-ri gutuna. Maitasun istorio bat’ testua abiapuntu hartuta idatzitako gidoiarekin.
Kulunka konpainiak sortu du bi adinekok osatutako bikotea protagonista duen istorioa; antzezleek hitzik esan gabe hezurmamitzen dituzte, maskaraz lagundutako keinu bidezko antzerkia erabiliz. “Lengoaia horretaz maitemindu ginen oso zuzena delako, ez du bitartekaririk behar. Lengoaia unibertsala istorio unibertsal batentzat”, azaldu du Jose Daultekin batera konpainia osatzen duen Garbiñe Insausti antzezleak. Horri esker, elkarrengandik oso urrun dauden Argentina, Txina eta Nepal bezalako herrialdeetara eraman ahal izan dute antzezlana.
Muntaiak ihes egiten die mizkeriari eta malko errazei, ikusleak sentimenduzko mundura eramateko, hauek harrapatuz samurtasunez eta freskotasunez beteriko formula baten bidez.
Segur aski asko interesatuko zaizu...