"Botere zapaltzaileak itsuskeria eta tristura proposatzen ditu; eta edertasunaren eta alaitasunaren bidez erantzun behar diogu gauzak aldatzeko". Asmo adierazpen biribil horren bidez justifikatzen ditu Alberto San Juanek (Madril, 1968) antzerki-obra hau (orain arte egin duen bakarrizketa bakarra) idatzi eta antzeztera eraman zuten arrazoiak. Lan honetan, umore azidoa barra-barra erabiliz, gaur egungo egoera sozial, politiko eta ekonomikoa aztertu du, bankuen eta politikarien jokabidea kritikatuz,  baina baita gauzak aldatzeko ezer egin zutenena ere (hala nola bere pertsonaia bera).

'Autorretrato de un joven capitalista español' aktoreak berak egindako ikerketa-lanaren fruitua dugu. "Bizi dugun egoera katastrofikoaren aurrean, sektore jakin baten mendean bizi izatera nola iritsi garen jakiteko premia nuen", azaldu du.

Gogoeta pizteko galderak bai, baina bereziki irribarrea piztekoak. Agian gauzak aldatzen hasteko lehen pausoa izan daiteke hori.