Azkuna Zentroko Erakusketa Aretoak urtarrilaren 29an, osteguna, 19:00etan, eszenaren eta ikusleen arteko mugak desegiten dituen ikuskizuna hartuko du. Roger Bernatek, antzerki parte-hartzailearen erreferenteetako batek, La Consagración de la Primavera lana berrirudikatu du dantzari profesionalik gabe, eta pertsona kopuru mugatu bati aukera ematen dio obra bera taularatzeko.

Pieza Pina Bauschek 1975ean sortu zuen Tanztheater Wuppertalentzat, Igor Stravinskyren jatorrizko partituratik abiatuta, eta ordutik Alemaniako antzerki-dantzaren obra ikoniko bihurtu da. Hizkuntza koreografiko sentsual, basati eta guztiz gizatiarrarekin, kolektibitatea, sakrifizioa eta gorputzen zapalkuntza bezalako gaiak jorratzen ditu. 2010ean, Bernatek lan hori berrasmatu zuen, pieza kolektibo bihurtuz, emanaldi bakoitzean aldatzen den esperientzia gisa. Ordutik, mundu osoan antzeztu da eta hamabi hizkuntzatara itzuli da.

Proposamena sinplea bezain erradikala da. Espazio huts batean, parte-hartzaile bakoitzak haririk gabeko entzungailuak jasotzen ditu, eta horien bidez ahots batzuek koreografia- eta portaera-jarraibide errazak transmititzen dizkiote. Pixkanaka, keinu minimoetatik erritu bat sortzen da: koreografia partekatu bat, aldi berean esperimentu indibidual eta komunitario gisa funtzionatzen duena. Entzungailuetatik Stravinskyren partituraren birsorkuntza ere entzuten da, Cristóbal Saavedraren eskutik; Joan den mendeko balet garrantzitsuenetako baten oihartzuna gaur egungo gorputzetan berriz pizten da.

Azkuna Zentroaren eta Roger Bernaten konpainiaren arteko elkarlanari esker, ikuskizuna euskaraz ere esperimentatu daiteke, bere izaera inklusiboa eta tokiko testuinguruarekin duen lotura indartuz. Ahotsak paraleloan agertzen dira, elkarrengandik aldendu eta gurutzatzen dira, eta polifonia horrek gidatzen ditu ikusle-protagonistak, jolasaren eta koreografiaren artean dabilen esperientzia batean.

Proiektu kooperatiboak

Roger Bernat artista eta sortzaile eszenikoak 2008tik garatzen ditu ikusleen gorputza obraren erdigunean jartzen duten proiektu kooperatiboak. Domini Públic, Pura coincidència, Please Continue: Hamlet edo Numax-Fagor-plus bezalako lanek sendotu dute bere ibilbidea, eta azken hamarkadan Documenta Kassel, São Pauloko Bienala edo antzeko instituzioek ekoitzi dituzte bere proposamenak. 2017an Sebastià Gasch Saria jaso zuen antzerki-zuzendari gisa egindako lanagatik.

Bilbon, La Consagración de la Primavera ikuskizuna ez da soilik ikustekoa: bizitzeko gonbita da. Ordubetez, Erakusketa Aretoa erritu partekatu baten eszenatoki bihurtuko da, eta bertaratutakoak, komunitate iragankor baina bizi baten partaide.