PATXO TELLERIA ETA MIKEL MARTINEZEK EUSKARAZKO UMOREAREN MUGAK ZABALDU ZITUZTEN ‘EUSKARA SENCILLOAREN MANIFESTOA’ ABIAPUNTU IZAN ZUEN TRILOGIAREKIN. ORAIN, FARMAZIA-MULTINAZIONALEN LEPOTIK BARRE EGITEA PROPOSATZEN DIGUTE KOMEDIA ‘BARBARO’ HONEKIN. BIRUS MISTERIOTSU BATI AURRE EGIN NAHIAN, HIRU HERRITAR ZINTZOK BERE BURUA ESKAINI DUTE TXERTOA PROBATZEKO.
Galderatzat | Komedia 'barbarotzat' aurkeztu duzue muntaia hau. Zer esan nahi du horrek?
E | Jendeak barre egingo du, barre piloa, barbaroa. Baina gaia berez, oso serioa, krudela eta barbaroa da.
G | Umorea oso kontu serio batekin nahastu duzue: farmazia multinazionalen trikimailuak. Umorea kritika soziala egiteko tresna egokia ere izan daiteke?
E | Umoreak kritika soziala egiteko balio du, jakina, mitinek eta panfletoek baino askoz ere gehiago. Galdetu bestela Dario Fo-ri, esate baterako
G | Ildo horretan, Patxok eta biok erregistro berria aukeratu duzue aurreko produkzioekin alderatuz . Zergatik aldaketa hori?
E | Ez Dok Hiru Bikoteatro’-ren lanetan euskaldunen munduan zentratzen gara. Oso gustura mugitzen gara formula horretan eta jarraituko dugu. Baina orain oporrak hartu eta munduari buelta eman diogu. Gai zabalagoa hartu dugu, unibertsalagoa, eta formula ezberdina, Ez dok bi. Umore eta ironia mota, halere, antzekoa izango da, ziur aski. Geuk geuk egin baitugu, eta beti egiten dugu gustatzen zaiguna.
G | Diabetesaren aurkako botika batek Frantzian ehunka lagun hil dituela jakin berri dugu. ' Larria, kutsakorra...' egiazko gertakizunetan oinarritua dago?
E | Gauza batzuk buruan izan ditugu, bai, batez ere azken urte hauetan gertatzen ari dena hainbeste gaixotasun fantasmarekin. Farmazeutikoak beharrezkoak izango dira, bai, baina botere handiegia daukate eta erne egon behar dugu.
G | Azkenik, zergatik joango zinateke antzezlan hau ikustera?
E | Ikusle potentzialak jakin dezan hemen talde oso bat dagoela, idazleak, zuzendaria, aktorea... talde oso bat, larrua bertan uzteko prest dagoena bera, ikuslea, hunkitzeko. Zuen barre eta zirrara da gure elikagaia, gure helburu bakarra.
Segur aski asko interesatuko zaizu...
