Aireko dantzaren izaerari buruzko gogoeta luzeaz bete genezake artikulu hau. Zenbaiten arabera, akrobaziekin nahastutako gaur egungo dantza da; beste batzuek, aldiz, zirkuko arteen atalean sailkatzen dute. Baina eztabaida hori ez zaio batere interesatzen Pedro Arias Compañía de Hecho-ko zuzendariari. “Ez dago zertan ezer ulertu”, dio berak. “Magiarekin jolastu eta gizakion begietarako ezusteko irudiak sortzeko bidea ematen digun zerbait besterik ez da”, gehitu du konpainia sortu baino lehen La Fura dels Baus, Rafael Amargo eta Lindsay Kemp-ekin lan egin zuen dantzari eta koreografoak.
Pedro Ariasek denbora asko eman du eraikinetako fatxadetatik esekita. Izan ere, soka elastikoen bidez lagundutako dantza bertikala da bere taldearen espezialitateetako bat. Emanaldi honetan, berriz, ‘El sueño del insomne’ aurkeztuko du, areto itxietarako sortu duen hirugarren ikuskizuna.
“Gauzak nonahi gertatzen diren espazio tridimentsionala ikusten dute ikusleek”, aurreratu du ikuskizunaren arduradunak, “pertsonaia nagusiak insomnioa du eta bere amets eta amesgaiztoei aurre egin beharko die loa harrapatzea lortu arte”. Hori guztia eszenografia ikusgarri batean gertatzen da, aktore-dantzariek hegan egiten baitute eszenatokian soka elastikoez lagunduta. “Horrek mundu berria sortzeko bidea ematen dit”, laburbildu du Ariasek.
Beharbada horregatik hobe izango da aireko dantzaren izaerari buruzko eztabaidetan astirik ez galtzea. Muntaia ikustea izango duzu onena.