Dejabu konpainiak Franco hil ondorengo lehen urteetan girotu du baserritik hirira bizimodu berriaren bila joandako neska bati buruzko istorioa. Zuzeneko musika, utopiei eta ametsei buruzko kontakizunean.

Mundua aldatzeko teatroa

Une historiko bat eta abesti bat. Unea: Franco hil ondorengo urteak. Abestia: Benito Lertxundiren ‘Gure bide galduak’, gurasoen mundua aldatu nahi zutenen himnoa. Hori da Dejabu Panpin Laborategia konpainia gazteak proposatzen duen muntaiaren abiapuntua.

Herria utzita Donostiara irakasle-ikasketak egitera joandako neska baten istorioa aurkezten dute bost aktorek eta musikari batek, antzezpena eta musika (tartean Lertxundiren abestia bera) nahasten dituen kontakizunean. 70eko hamarkadan bezala, errealitatea aldatzeko nahia da antzezlenaren motorra. “Ez da kasualitatea une hori aukeratu izana”, dio Ainara Gurrrutxaga aktoreak. “Obra honek behar bati erantzuten dio. Sentitzen dugu ziklo bat bete dela eta zerbait berria sortzeko garaia dela”, erantsi du.

Mundua aldatzea posible zela zirudien garaiaren antzerti-erretratu bizi eta freskoa dugu ‘Gure bide galdua’, euskarazko teatroa bera eraldatzeko berebiziko ekarpena egiten ari den konpainia gazte batek sortua."