Kondairak dioenez, Sallie Ford-ek, Portland-eko pubetan kantatu ohi zuen taberna-zerbitzariak, Alaskatik zetozen hiru marinelekin topo egin eta The Sound Outside hirukotea osatu omen zuen, han-hemenkako jardunetan bateriaz, kontrabaxuaz eta gitarraz akonpainatzen duen berbera. Horixe litzateke, EP bat eta iraupen luzeko bat plazaratu dituen vintage izaerako priektu honen jatorria.

Ipar Karolinan jaio eta Tom Waits inspirazio-iturritzat aldarrikatzen duen hogeitaka urteko kantariak lo-fi espiritua, rockabilly-zantzuak eta aurreiritzirik gabeko eta bluesa bezalako soinu zaharrik gabeko trobak biltzen dituen 'Dirty radio' izenburuko albuma plazaratu berri du. Aurreratu duenez, bigarren albuma ere grabatuta dauka, bestea baino psicodelikoagoa eta rock-and-rollari atxikiagoa.

Zuzeneko jardunean dibertsioa bermatuta dago, baldin eta Azkena Rock Festivalaren azken edizioan izandako mailari eusten badio, bera izan baitzen Robin Gibb zenaren omenezko eszenatoki txikiko sorpresarik atseginena.