Testua: Igor Cubillo |
"Hey, chipirón! Todos los días sale el sol, chipirón!". Errepika honen babespean, Bongo Botrakok leku ederra lortu zuen duela bi urte musikaren esparruan, lehendabiziko diskoa kaleratu zuenean. Baina orain zuzen-zuzenean aurkeztu behar du bigarren lana, 'Revoltosa'. Dendetara azaroaren 12an iritsi zen, Amparo Sánchezek ekoitzita eta Kaki Arkarazok grabatu, nahastu eta masterizatuta.
Lan honetan, Tarragonako taldeak ahalegin berezia egin du giro ona, itxaropena eta positibismoa zabaltzen jarraitzeko, egungo egoera ekonomiko eta sozial latzaren gainetik, baina egoera honi bizkar eman gabe, kontsumismoaren eta diruzaletasunaren ondorio gaiztoei buruzko testuak medio. Erritmo jamaikarrek eta soinu latinoek distira eta berotasuna ematen diote proposamen mestizo parrandazale eta konpromisozale honi, bizitza arrosa kolorekoa ez dela eta askatasunak inork oparitzen ez dituela gisako baieztapenak tarteko direla. Halere, hauen kontzertuak benetako ospakizunak izan ohi dira.