Estibaliz eta Miguel Moyano dira 2007. urtetik Clarisse talde getxotarraren buruak. Pop-aren, rock-aren eta mugako soinuen arteko fusioa bilatu dute 'Alas cortadas' estreinako diskoan. Lanak moldaketa ugari ditu, emakumezko ahots bikainaren indarra eta arrakasta komertzialerako hornitua dago.
Noiz edo noiz talde berri bati ongietorria emateko garaia izaten da. Heldu berria Clarisse bezalako taldea bada, akorde bakoitzean ilusioa eta freskotasuna darion taldea, merezi du haien proposamena entzuteko astia hartzea.
Clarisse-ren xarma mugaldeko soinuez zipriztindutako pop-doinu zainduetan datza, hori guztia Estibaliz Moyano abeslariaren ahots epel eta adierazkorrak lagundurik. Harekin batera jardun du taldea sortu zenetik Miguel Moyanok (gitarra), eta biei Albaro Alonso (bateria ) eta Javi Martin (baxua) elkartu zitzaizkien geroago.
Entzuleen zein kritikarien aldetik harrera ona izan zuen sei abestiz osatutako lehen ‘demo’-aren ondoren, ‘Alas cortadas’ lehen albuma heldu da, Andoaingo Garate estudioan grabatua Kaki Arkarazoren ekoizpenarekin; lanak mugaldeko soinuen eragina duten 12 pop abesti on biltzen ditu, horizonte berrien bilaketa iradokitzen duten testu zainduekin.
“Denbora luzea eman dugu kantu hauetan lanean eta oso ilusionatuta gaude emaitzarekin”, aitortu du Estibalizek berak taldearen hastapenak gogoan; izan ere, Clarisse 2007an sortu zen eta kontzertu ugari eman du eman du hainbat pub eta areto txikitan. Orain hegoak zabaltzeko garaia dute.
Segur aski asko interesatuko zaizu...