Beste batzuk ez bezala, sari hauek ez dute lehiaketa izaerarik ezta estiloaren araberako kategoriarik ere, aurkeztutako lanek bete beharreko baldintza bakarra 2017ko iraila eta 2018 abuztua bitartean argitaratuak izatea baita. Sari emate ekitaldia Iruñako Baluarten antzokian egingo da, azaroaren 27an 19.00etan.

Ekimenak Euskal Herrian sortu eta ekoitzitako musikaren kalitatea aitortzea du helburu, musikarien beraien eta sektoreko gainerako profesionalen lana sarituz, ikusleak eta gizartea orokorrean musika sektorearen garrantziaz sentsibilizatzen laguntzeaz gain. Epaimahaiak emandako bost sariez gain, bi golardo berezi daude, bat sariketa antolatzen duen Euskal Herriko Musika Bulegoa Elkarteak (EHMBE) emandakoa eta bestea Etxepare Institutuak sustatzen duena, iaz Berri Txarrak taldeak irabazi zuena.

Aurreko bi edizioetan saritutakok honako hauek izan dira: Juanjo Mena (Berlingo Orkestra Filarmonikako zuzendaria), Angel Unzu (Duos), Amorante (Amorante), Rural Zombies (Bat), Ruper Ordorika (Guria Ostatuan), Ramon Lazkanoren zuzeneko lana (Festival d´Automne à Paris-Portrait), Elena Setien (Dreaming of Earthly Things) eta Zuhainpeko Soinuak. Horrez gain, EHMBEk sari berezi bana eman zien Audiolab eta Jazzargia elkarteei.

Sarituek 3.000 euro eta Fernando Mikelarena artistak sortutako eskulturaren kopia jasotzen dute. Musika Bulegoa Sariak EHMBEren ekimena dira, eta Eusko Jaurlaritzaren, Nafarroako Gobernuaren, Iruñako Udalaren eta Etxepare Institutuaren babesa dute.