Gaur egungo literaturako umorezko libururik onenetako baten euskarazko egokitzapena aurkezten du Ados Teatroa konpainiak. Muntaia barregarria eta egoera surrealistaz betea.

Eleberri baten testua antzerkirako egokitzea erronka handia bada, 22 hizkuntzatan 10 milioi ale baino gehiago saldutako izenburu batekin egiteak areagotu egiten du desafioaren tamaina. Horrek, ostera, ez du kikildu Ados Teatroa konpainia Tom Sharpe idazle britainiarraren lanik gorena den ‘Wilt (panpina puzgarriaren hilketa)’-ri heltzerakoan.

‘Wilt’-ek ukitu poliziakoz zipriztindutako endredozko komedia baten osagai guztiak biltzen ditu: emaztea hiltzeaz amets egiten duen irakasle deprimitu bat, norbaitek hilotz batekin nahastu duen panpina puzgarri bat eta egoera are gehiago nahasten duen komisario xelebre bat. Hori guztia, bat bera ere tente uzten ez duen istorio baten zerbitzura, tartean eskola-sistema, polizia eta giza-harremanak. “Baina emaitza komedia atsegin eta ulerterraza da, estilo alaiaz kontatua”, ohartarazi du Mikel Laskurain antzezleak, muntaiaren protagonistetako batek.

Pieza horiek nahastuz, etenik gabeko dibertsioz beteriko 90 minutu eskaintzen dizkigu Ados Teatroak.