Ubeda anaiak (Deabruak Teilatuetan-eko kide ohiak) buru dituen Tolosako taldeak inork baino hobeto uztartu ditu pop doinu atseginak eta euskarazko testu poetikoak. Hala egin du 1988tik hona, betiere folkaren eragin nabarmenarekin. '77' du izenburu bere disko berriak.
Norbaitek, edo zerbaitek, bidegabe jokatu du Bide Ertzeanekin. Gezurra dirudi Tolosako taldeak Euskal Herrian oraindik audientzia handiagorik ez bereganatu izanak, kontuan hartzen badugu nolako potentziala duen, nola menderatzen duen melodia, euskaraz aritzen dela, poesia duela erreferentzia eta osagai, eta memoria historikoa bezalako gai korapilatsuetan bustitzen dela. Agian entzule asko ez daude prestaturik pop bikainez eta testu mamitsuz beteriko errepertorioa dastatzeko, salbuespen distiratsua euskarazko eszenan.
Edonola ere, Ubeda anaiek eta Karlos Aranzegi bateria-jotzaileak ez dute etsi; hirukote formatua berreskuratu eta zuzenean grabatu dute (estudioan) '77', aurrekoak baino gordinagoa den diskoa. Bederatzigarrena dute 15 urtetan, jendearen gustu ona bereganatzeko bederatzigarren oldarra, 1977aren ondorengo "bake hotzari" melodia jartzeko modua, urte hartan haien senide bat hil baitzuten polizia-kontrol batean. Hari musikala baino askoz gehiago.
Segur aski asko interesatuko zaizu...