Smile-k 2007an debutatu zuen 'Painting the sun one colour'-ekin. Estatubatuar ukituko diskoa zen hura, contry zipriztinak ahotsen euskarri gisa erabiltzen zituena, betiere melodiaren bila eta poparen eragin nabarmenarekin. Taldeko kideek aitortu zutenez, 60ko hamarkadako pop-ak, AEBetako Mendebaldeko Kostako hippien soinuek eta 70ko urteetan arrakasta izan zuten ahots-armoniek aztarna utzi zuten beraiengan.

Sei urte geroago, 'Out of season' kaleratu dute, taldearen hirugarren Lp-a. Eta arestian esandakoak, hein handi batean, bere horretan dirau Donibane Lohitzunen eta Sopelan grabatutako lan honetan. Hala ere, John Franks ingelesak, hasieratik taldearen izan denak, heldutasun handiagoa azaltzen du konpositore gisa. Eutsi egiten dio surf kulturarekiko loturari, baina orain ez da agerikoa; bere abestiak serioagoak bilakatu dira. Popa eta folka ez dira desagertu, baina itxura gordinagoa hartu dute. Eta hori guztia oso ona da. Smile hazi egin da.