María Joao eta Mario Laginharen arteko harreman artistikoak 1983an hasi ziren, kantariak lehen diskoa (‘Quinteto Maria Joao’) Mariok pianoaz lagunduta grabatu zuenean. Elkarlan hori ehunka kontzertutan eta dozena bat grabaziotan soberako konplizitate eta iaiotasuna frogatu duen elkarketa artistiko baten ernamuina izan da. ‘Chocolate’ dugu jazz zirkuituetako ohiko partaide bihurtu den bikote portugaldar honen azken lana, baina bere errepertorioan musika klasikoaren printzak ere ageri dira, Portugal, Brasil eta Afrikako musika tradizionalaren osagaiekin batera. 
Elkarren bertuteak osatu eta areagotzen dituzte. Begibistakoa da Laginhak The Hamburg Radio Band, The Remix Ensemble eta The Drumming Percussion Group gisako proiektuetan bildutako esperientzia, gozatzeko modukoa Joaoren ahots-moldagarritasuna, eta arras ulergarria Wayne Shorter eta Gilberto Gil bezalako artistekin batera jardun izana. Eszenatokian, Nelson Cascais kontrabaxuan eta Alexandre Frazao baterian daudela azaltzen dira.