2014-01-28

Wynton Marsalis eta Kenny Barron-en diszipulua, Raynald Colom (Vincennes, Frantzia, 1978) nazioarteko jazz tronpeta-jotzaile kotizatuenetako bat da. Manu Chao, Chicuelo eta Perico Sambeat gisako izarrekin batera aritua, duen jakituria nabaria da 'Rise' bikainean, bere albumik berriena.

Harry Potterrek makilatxo magikoa aukeratu ez zuen bezalaxe, berak ere ez zuen hautatu, berez heldu baitzitzaion eskuetara. Aitak (hura ere musikari profesionala zen) tronpeta bat oparitu zion zortzi urteko besterik ez zela eta lau zeramatzala biolina jotzen. Topaketa horren ondorioz hasi zen Raynald Colom (Vincennes, Frantzia, 1978) nazioarteko jazz tronpeta-jotzailerik onenen artean jarri duen ibilbidea musikala.

 

Ezin Colomen soinuaren magia ulertu bizileku duen El Raval Bartzelonako auzo multiarrazialaren testuinguruan kokatu gabe. Han ezagutu zuen Manu Chao, zeinarekin 'Clandestino' biran jo baitzuen. Hala, bere musikan zipriztin flamenkoak, klasikoak eta hip-hoparen sartzen dira, beti naturaltasunez eta behartu gabe.

 

Eragin horiek guztiek, jazz klasikoarekin batera, kolorea jartzen diote 'Rise' (2012) album berri bikainari. Genero hau une bakar eta errepikaezinetan dastatzen dela sinetsita, zuzenekoaren lengoaiara itzuliko du erabat gomendagarria den bira honetan.