Alemania mendebaldeko Essen hirian saioak egiten hasi eta 30 urte geroago, Kreator taldearen ospea gorantz doa etengabe. Taldeak ez zuen izenik hartu 1984a arte. Tormentor izenaz bataiatu zuten orduan, baina hurrengo urtean oraingo izendapena hartu zuen.

Izen-dantza gaindituta, laukotea thrash-aren eredu gorena bilakatu da gaur egun, 'Phantom Antichrist' argitaratu berri dien disketxearen babesari esker. Album honetan (13a), Antikristoak, heriotza, gorrotoa, infernuak eta desagertutako zibilizazioak ardatz dituzten kantuak dira nagusi, orain arte mina, odola, gezurra eta indarkeria agerian zituen kantutegi ilunari itzal berriak erantsiz. Epika iluna muturreko errepertorio azkarraz baliatzen da, gitarren aztarna sakona, Mille Petrozzaren ahotsa eta Jürgen Reilen bateriak eragindako hardcore-erritmo bizi-biziak tarteko direla. Bi horiek dira jatorrizko taldeko kide bakarrak.