Abenduaren 16an, Loraldiak bere komunitatea bildu zuen Bilbon: erakundeak, babesleak, sortzaileak, kolaboratzaileak, enpresak eta Lorazainen sarea. Topaketaren helburua bikoitza izan zen: 2025ean elkarrekin egindako ibilbidea partekatu eta ospatzea, eta 2026ko Loraldia Festibalaren ateak zabaltzea. Informazioa eta esperientzia artistikoa eskutik joan ziren, Janus Lesterren zuzeneko emanaldiak giroa berotu baitzuen, eta une esanguratsuarekin amaitu zen ekitaldia: sarreren salmentaren irekierarekin, abenduaren 17tik aurrera aktibo.

Urteko balantzean argi geratu zen Loraldia jaialdi bat baino askoz gehiago dela. 2025ean, zazpi lan-ildoren bidez garatu den kultur proiektu integrala sendotu da: Festibala, Eskola, Produkzioak, Plaza, Gaztea, Digitala eta Lorazainak. Ildo horien bitartez, sormen garaikidea Bilbon eta Euskal Herriko beste herri batzuetan zabaldu da, euskarazko produkzio propioa bultzatu da, hezkuntzatik transmisioa landu da eta komunitate kulturzalea indartu da, bai espazio fisikoetan bai ingurune digitalean.

Topaketako unerik zirraragarriena 2026ko edizioaren aurrerapenarekin iritsi zen. BAGA, BIGA, HIGA, MAURIZIA! lelopean, Loraldia Festibala martxoaren 9tik 28ra bitartean itzuliko da Bilbora hamabigarrenez, euskal kulturaren proposamen berritzaileenak plazaratzeko. Guztira, 25 proposamen artistiko eta 29 jarduera aurreikusi dira, musika, dantza, antzerkia, zinema, literatura, bertsolaritza, esperientzia digitalak eta formatu murgiltzaileak uztartuz.

Aurreratutako programazioan, besteak beste, Nogen taldearen 10. urteurreneko ospakizuna eta Ikimilikiliklik Vol. 2 Loraldiaren ekoizpen berria nabarmendu dira. Antolakuntzak azaldu duenez, helburua “ikusleak harritzea eta emozionatzea da, euskaratik eta sormenetik abiatuta”, eta Janus Lesterren emanaldia espiritu horren isla izan zen. Horregatik, 2026ko Loraldia Festibaleko ekintza gehienetarako sarrerak jada eskuragarri daude.