Patti Smithek halakoxe mito kutsua hartu du, 70etan punka, R&Ra eta new wavearen gaina eta lorea biltzen zuen New Yorkeko CBGB klub ezaguna bisitatzen hasi zenetik. Garai hartakoak dira 'Horses' eta 'Easter' grabazioak, bere errepertorioko 'Gloria', 'Rock N Roll nigger' eta 'Because the night' bezalako klasikoak biltzen dituztenak, gerora spoken-rocka eta bestelako esperimentazio-alorrak jorratzera bultzatu duten ibilbide artistikoaren eta kantutegiaren oinarriak.
Kantari estatubatuarra rocka eta poesiaren arteko fusioaren eredu dugu, eta bere biografia intimoan, Robert Mapplethorpe argazkilaria eta Fred 'Sonic' Smith musikaria ageri zaizkigu. Azken zortzi urteotako material argitaratu gabea bilduz, 'Banga' kaleratu berri du. Kritikak konpromisoa eta erreferentzia literario eta historikoak uztartzen dituen rock helduaren erakusgarritzat jo du, eta bertan parte hartu dute, besteak beste, Tom Verlainek (Television) eta bere seme Jackson eta Jesse Parisek.