Bere defendatzaileek Nina Simone, Billy Holliday, Sarah Vaughan, Carmen McRae, Joni Mitchell eta Ricki Lee Jonesen arteko hibridotzat aurkezten dute Carmen Souzaren ahotsa. Ez da huskeria. Baina konparazioaetatik at, aurreiritzirik gabe entzutea dugu onena. Cabo Verdeko gurasoak dituen kantari lisboarrak soberako nortasuna du, eta berezko estiloa duen proposamen dotorea sortu du. World-musiceko eta jazzeko osagaiak biltzen dituen jardun berezi horrek Afrikako eta Amerikako argien berotasuna du. Esandakoa: ez da huskeria, berezko sena baizik.

Horren froga dugu bere diskografia erakargarria. Berrikitan, 'Live at Lagny Jazz Festival' izenburuko lana kaleratu du, Frantzian zuzen-zuzenean grabatutakoa. Bertako 12 kantuek ezin hobeto islatzen dituzte hogeita hamar urte inguruko kantari honen ahots-trebetasuna, harikortasuna eta menperatzen dituen erregistroen aniztasuna. Musikaireko ikusle bat baino gehiago harrituta eta maiteminduta geratuko da ahots honekin.