Lionel (saxoa) eta Stephane (tronpeta) Belmondo anaien musika esperientzia erabat gomendagarria da, bai jazz-zaleentzat eta bai musikaren eremu berriak esploratu nahi dituzten musikazale guztientzat.

Frantziako jazzaren abangoardiaren erakusle nagusiak, Europako eszenako erreferenteak eta B-Flat Recording zigiluaren bultzatzaileak, Belmondotarrek generoaren zaleen arreta bereganatu zuten iragan mendeko 90eko hamarkadaren hasieran Parisera bizitzera joan zirenetik. Hantxe hasi ziren aldi berean hipnotikoa eta sotila den berezko soinua taxutzen; horren lehen emaitza izan zen ‘Jazz at Reims’ estraineko diskoa, boskote formatuan grabatua. 

Ordutik hona, gorespenak eta sariak irabazten hasi ziren (tartean 1994ko Django Reinhardt Talde Onenaren Saria) ‘Hymne au Soleil’ album bikainarekin gorenera heldu zen ibilbidean; hain zuzen ere, disko hori berriz masterizatu eta argitaratu dute 2011ean.