Musikari estatubatuarra autore-abestien, jazzaren eta poparen artean mugitu da hiru hamarkadatan zehar. Tom Waitsen neska-lagun izandakoa, konpromisoa azaldu da azkenaldian grabatu dituen lanetan; horietako berriena, 'Balm in Gilead', atzera begirako lan atsegin eta ulerterraza da.
Duela 30 urtetik gora, eszenako zimentarriak astindu zituen lehen albumarekin. Rickie Lee Jones-ek, ‘Foreign affairs’en azalean eta ‘Blue Valentine’ren kontrazalean Tom Waits-ekin besarkatuta ageri zen neskak, bere gain hartu zituen protagonismoa eta fokoak, eta errekonozimenduak haren look frantsestu eta ahots apartaren gainean metatu ziren. Gaur, izarren distiratik eta sailkapen guztietatik at dagoela, gurtzeko moduko artista bilakatu da, eta harrotasunez esan dezake bizitzaren alde basatienean bizi izanda ere, kontatzeko gauza dela oraindik.
Bere azken lanak ‘Balm in gilead’ (14. diskoa) eta ‘Live in Stockholm’ DVDa izan dira, baina estatubatuarrak jardunean daramatzan hiru hamarkadak ospatuko ditu 2011n ‘Rickie Lee Jones’ eta ‘Pirates’ izeneko bere lehen lanak ardatz dituen errepertorio batez. Horietan hasi zen bere estilo berezi eta misteriotsua lantzen, ñabardura jazzi eta bohemioekin. Auto azkarrak, bihotz bakartiak, ilunabarrean ia itzarrita dagoen unibertso erakargarri hori eta Check E. Weiss bezalako lagunak tarteko direla.
Segur aski asko interesatuko zaizu...