Musika korala eta jazza elkarren osagarri dira Juantxo Zeberio pianojole tolosarraren laukoteak (kontrabaxua, saxoa eta bateria aldean dituela) Hodeiertz koruarekin batera grabatu dituen bi lanetan. Horren espirituari oratu dio orain EHUko koruarekin, Enrique Azurzaren zuzendaritzapean.

Jazzak har ditzakeen kolore anitzen artean, Juantxo Zeberi piano-jotzaile gipuzkoarrak proiektu honetarako aukeratu duena ezohikoenetako bat izan daiteke beharbada. Agian arrazoi hori dela eta (eta proiektuan parte hartzen duen musikarien kalitateagatik noski) aparteko interesa du publikoarentzat.

Musika korala jazzarekin uztartzeko asmoa "prozesu natural baten emaitza" izan zen bi generoak ondo ezagutzen dituen musikari honentzat. "Musikari gehienok poliedrikoak gara", azaldu du. "Musika koralaren kolorea aprobetxatzen saiatu gara, giza ahotsa dagoen instrumenturik hunkigarriena baita", erantsi du.

Umama! du izena prozesu horren fruituak, errepertorio koral klasikora egindako hurbilketa jazzistikoa, non musikari laguntzaileek jartzen duten generoari suposatzen zaion bat-batekotasun dosia. Proposamen erakargarria eta bereziki interesgarria.