Historiako rock and roll talderik handienean 31 urte egin ondoren, Bill Wymanek Rolling Stones utzi zuen 1993an. Erabaki hark amaieran eman zion komunikabideetan gehiegi agertzeari, baina ez zion ahanztura ekarri. Musikazaleak haren atzean dabiltza Rhythm Kings zortzikoteko buru bihurtu zenetik. Taldearen kontzertuak R&R, bluesa, swinga, boogiea, jump & jivea, country-oihartzunak eta rhythm & blues ugari biltzen dituzten ospakizunak dira 1996az geroztik. Musikari britainiar mitikoak, hirurogeita hamar urte baino gehiago dituen arren, teklatu, bateria, gitarra eta metalen babespean ageri da eszenatokian, Madeline Bellen ahotsa eta Georgie Fameren Hammonda lagun dituela, eta gorputza mugiarazten dio jendeari estandar desberdinen interpretazioaz. 'I got a woman' eta 'Roll'em Pete' dira bakarkako errepertorioan sartu dituen klasikoetako batzuk. Dozena erdi albumetan kaleratu ditu, Willie And The Poor Boys proiektuarenak kontuan hartu gabe.