Erregistro zabaleko konpositore bikaina, Jason Moran pianista estatubatuarra etengabe hazi da musikari moduan 1997an Blue Note etxeak fitxatu zuenetik. 1999an The New York Times-ek emandako urteko jazz albumaren saria eskuratu zuen 'Soundtrack to Human Motion' lanagatik.

Hogeita hamar urte inguru dituela, Jason Moran erreferentzia bihurtu da jazz munduan. Orain, Bandwagon hirukotearekin datorkigu, pianoa, baxua (Tarus Mateen) eta bateriaren (Nasheet Waits) laguntzaz, baina teklen ohiko diktadurarik gabe. Bandak instrumentuen arteko elkarrizketa landu du, eta horien arteko adostasuna, trebezia eta eklektizismoari esker, homogeneotasunetik ihes egin eta erritmo desberdinak txertatzea lortu du, sentiberatasunari lehentasuna emanez doinu geldoetan eta izaera abstraktuagoa arinetan.

‘Ten’ (Blue Note) dugu taldearen zortzigarri albuma, bluesa, funk ukituak, post-boparen oihartzunak, Jimi Hendrixengan inspiratutako doinuak eta Thelonious Monk bezalako idoloei eginiko omenaldiak biltzen dituena. Hori eta gehiago espero daiteke Texasen jaio eta New Yorken bizi den piano-jotzaile hip hop-zale honengandik. Sei urtez hasi zen musika egiten eta Greg Osby, Cassandra Wilson eta Joe Lovano gisako lagunekin grabatu du. Bilbon, ‘Same mother’ diskoan parte hartu zuen Marvin Sewell gitarra-jotzailea izango du lagun.