Gitarra entxufatuz musika herrikoia irauli zuen Bob Dylan agurgarriaren antzera, Fairport Convention taldeko kideak ere ospetsuak egin dira folkari intrumentazio elektrikoa eransteko ausartziagatik. Horrela, folk rock etiketa ezin hobeto doakio talde ingeles honi. Bere karreraren hasieran, ozeanoaren beste aldera jauzi egiteko asmoz, Joni Mitchell eta Dylan bera bezalako musikarien konposizioak moldatzeari ekin zion erreparorik gabe.
1979an amaiera iragarri zuen, lehen aroa itxiz eta ‘Liege and lief’ album gogoangarria bezalako aztarnak utziz, baina ez zen guztiz erretiratu. Cropredy Festival delakoaren sorreraz, urteko topaketetan parte hartu eta, 1985ean, gaur egun 45 urte inguruko iraupena duen karrerari eutsi zion berriz ere. ‘Festival bell’-ek ‘Rising for the moon’ doinua berreskuratu du. Hauxe da, biolinaz eta mandolinaz baliatuta eta taldean hasiera-hasieratik dagoen Simon Nicol gitarra-jotzaile eta kantariaren buruzagitzapean, kantu-zerrenda aletzen duen boskoten honen azken diskoa.