Maurice Bejarten aztarnak, XX. mendeko dantzaren legendetako bat, bizirik dirau hark sortutako konpainian. Emanaldi honetan Maurice Ravelen 'Bolero' entzutetsua aurkeztuko du, beste pieza batzuen artean.

Maurice Béjart (Marseilla 1927 – Lausana 2007) hil eta bost urte geroago, haren izenak bizi-bizirik dirau oraindik dantzazaleen artean. Halakoxe itzal luzea utzi du, “interpretearen esentzia berreskuratzearren” 1987an ballet hau sortu zuen dantza munduko mito honek.

Dantza munduan lorratz sakona utzi duen XX. mendeko koreograforik handienetakoa izan zen, eta haren oroimenez, Béjart Ballet Lausane-k mundu osoko eszenatokietara eraman ditu sortzaileak amestutako lanak, maisuaren eskolan trebatutako 15 herrialde desberdinetako hogeita hemeretzi dantzariren eskutik. Balletak oraingo emanaldirako aukeratu duen programan, Bejart-en aspaldiko bi koreografia daude, ‘Bolero’ (Maurice Ravel-en musikaz, 1961ean estreinatutakoa) eta ‘Mephisto Valse’.

Taldearen 25. urteurrenean, Béjart Ballet Lausanne-k, sortzailearen espiritua bizi-bizirik mantendu nahian, gaur egun ikus daitekeen dantza-ikukizunik onenetakoa eskaintzen du.