Donostiako Jazzaldiaren egitaraua ez da jazzera mugatzen. Hala ere, bertako antalatzaileek harro esan dezakete genero horretako izar gehienak ekarri dituztela 48 urtetan zehar. Falta ziren bakanetako bat dugu Pharoah Sanders, 60ko hamarkadatik jardunean dagoen musikari mitikoa. Sun Ra-rekin grabatu zuen orduan, musikaren ikuspuntu kosmikorako halako gustu bera zuen izarra, eta bere eragin nagusietako bat izango zen John Coltraneren ohijo laguntzailea bilakatu zen.

Mende erdi baino gehiago iraun duen ibilbidean zehar, inprobisazioari lotutako genero honi ederki ematen dioten ezaugarriak erabili ditu jazza egiteko, hala nola askatasuna eta interpretatzeko ukitu abstraktua. Ia 40 albumeko diskografia du, dentsoa, giro eta moldaketetan aberatsa. Abangoardiari eta free jazz etiketari lotutako artista honek emanaldi bikaina eskainiko du zalantzarik gabe.