Fakeband taldea Getxokoa da, baina ez du inolaz ere betetzen Getxo Sound delakoaren estereotipoa, indie espirituarekin eta zarata ateratzeko grinarekin lotzen den etiketa hori. Talde honek sustrai amerikarrak eta gustu ona erruz azaltzen dituzten abestiak egiten ditu. Horren erakuslea da 'Too late, too bad' izeneko lehen diskoa.

Rock Indiana disketxe madrildarrak zuhurtasun aparta frogatu du berriz ere Fakeband taldearen lehen diskoa kaleratzean. Proiektuak talde mota desberdinetan trebatutako musikariak biltzen ditu; grina, zintzotasuna eta artisaua-antzea batzen dituzten gazte beteranoak. Proiektua, John Wayne eta Dolly Beatles gisako proiektuetan iragan amankomuna duten Tulsa eta Smile bezalako taldeetako kideen arteko topagune bihurtu da.

Ondo egindako lana, sentiberatasuna eta halan-holan gobernatutako energia uztartuz, ‘Too late, too bad’ diskoko errepertorioak eztanda egiten du zuzeneko jardunean, indar guztia askatuz eta instrumentuekin eta ahotsekin duten trebetasuna erakutsiz. Fokoen azpian, izerdi patsetan, zaharkitu gabeko kutsu klasikoa duen boskote honek bere onena ematen du, Mendebaldeko Kostaldeko melodiei eta ahots-harmoniari, jam banden hegoaldeko keinuei eta rock and rollari eutsiz. Fakeband-ek gogora dakarzkigu Eagles, Crosby, Stills & Nash, Tom Petty & The Heartbreakers... Sekulako luxua.