Latin jazzaren erritmoa eta tronpetaren soinu goxoa Michael Mossman-en karreraren ezaugarri bihurtu dira, musikari estatubatuarrak —17 urte zituela agertu zen nazioarteko eszenatokietan— Anthony Braxton-en orkestrarekin batera Europa alderik alde zeharkatu zuenez geroztik. Gero iritsi ziren birak eta grabazioak, Dizzy Gillespie, Lionel Hampton, Paquito d’Rivera, Art Blakey, McCoy Tyner, Michel Camilo eta Eddie Palmieri gisako artisten eskutik, baina Espainian Fernando Trueba zinegilea izan da bere babesle nagusia, elkarrekin lan egin baitzuten ‘Two much’, ‘Calle 54’ eta ‘Chico y Rita’ filmetan.
Bizkaiko hiriburuan izango da entzungai hard bop delakoaren erakusgarria, orkestrarako errepertorioan trebatutakoa, Bilboko Orkestra Sinfonikoko musikariekin batera. Bere jazz-boskotea ere tarteko dela, ‘Beneath the mask’ balleta, ‘Chico y Rita’ filmeko soinu-bandaren aukeraketa bat eta Matt Denis, David Raksin, Jelly Roll Morton eta Stevie Wonder-en doinuei egindako berrinterepretazioak eskainiko ditu.