Hiru urte igaro dira ETSren azken lanetik eta urtebete pasa da taldea oholtzatik jaitsi zenetik. Orain, inoiz baino indartsuago itzuli dira, barne bidaia baten ondorioz sortutako disko batekin: KONKISTA. Diskoa abenduaren 5ean argitaratuko da eta Durangoko Azokan ere aurkeztuko dute, taldearen ibilbidean orain arteko lanik pertsonalena eta berritzaileena izateko asmoz.

KONKISTA kontrastez beteriko lana da: mina eta sendatzea, zauriak eta sendagaiak, iluntasuna eta argia uztartzen dira bertan. Taldearen hitzetan, “KONKISTA bizitzaren irudikapen zintzoa da, kontraesanez eta anbibalentziaz betea. Kaos emozionaletik sortutako diskoa da, barneko konkista baterantz aurrera egiteko ditugun orbainak ulertzen saiatzen dena. Mundu guztiak bere lekua aurkituko duen babeslekua da.”

Disko honetan ETSk nazioarteko ekoizleekin lan egin du, euskarazko musikaren panoraman soinu abangoardistak txertatzeko. Estilo ezberdinen fusio ausartak taldearen etapa berri honetako heldutasun eta sormen askatasuna islatzen du, beti ere emozioaren eta nortasunaren muina galdu gabe.

Estreinaldia bera ere esperientzia errepikaezina izango da. KONKISTA azaroaren 30ean, 18:00etan, Gasteizko Buesa Arenan aurkeztuko dute, Arabako Foru Aldundiaren babesarekin eta Gaztearen laguntzarekin. Ez da kontzertu arrunta izango, baizik eta Listening Party berezi bat, non zaleek taldearekin batera entzungo duten diskoa, abestien atzean dauden istorioak eta emozioak zuzenean ezagutuz.

Ekitaldian proiektuarekin batera sortutako ikus-entzunezko edukiak ere estreinatuko dira, eta publikoarekin interakzio momentuak egongo dira, ETSk bere komunitatearekin duen lotura berezia indartuz. Taldeak “bere jendearentzako opari” gisa definitzen du hitzordua: intimitatea, musika eta elkarrizketa uztartzen dituen une sinboliko bat. Sarrerak azaroaren 13an, 11:00etan jarriko dira salgai.