Testua: Igor Cubillo |
Toumani Diabaték, Maliko griot edo juglareen tradiziotik edanez, musika afrikarra beste leku batzuetako soinuekin uztartu eta mundu osoaren aurrean bistaratu du, kora ezagutzera emanez eta 21 hariko harpa honen enbaxadore gorena bihurtuz. Arnaldo Antunes, musikari, poeta eta bideoartista, Titãs rock-taldeko kidea izan zen, eta Marisa Monte eta Carlinhos Brownekin jardun zuen Tribalistas-en. Edgard Scandurra, aldiz, Antuneseko gitarrajolea da, eta Ira! eta Smack-ekin grabatu du. Banaka hartuta, nazioarteko world musikaren alorrean karrera kontsolidatuak dituzten artistak dira. Elkarrekin, A Curva da Cintura osatzen dute.
'Superhirukoteak' disko bat plazaratu du, eta koraren zarrasta musika brasildarraren epeltasunarekin nahiz gaur egungo beste soinu mota batzuekin uztartuz sortu den mestizaje hori oholtza gainean zabaldu da, adostasun eta eraberritze musikalaren omenez eta distortsio rockerora ere joz. Arras gustagarria musika tradizionalaren zalerik porrokatuenentzat.