Dantzaz konpainia desberdina da. Desberdina da ez dagoelako hark egiten duena egiten duen beste erakunde independenterik: soilik dantzari gazteekin lan egiten, herrialde desberdinetako sortzaileen koreografiak erabiliz; dantza ulertzeko modu desberdinak hurbiltzen dizkiguten estilo desberdinak.
‘Mintzo’ du izena konpainiaren proposamen berriak. Gorputzaren lengoaiaren bidez, gizakion arteko komunikazioaz eta inkomunikazioaz hitz egiten digu muntaia honek.
Obra lau atalez osatuta dago, bakoitza europar koreografo batek sortua; horietako bat, Sophie Antoine, Dantzaz-eko kidea izan zen eta gaur egun Nürembergeko Balletean dihardu lanean.
“Oso albiste ona da gurekin aritutako dantzariak gaur egun konpainia profesionaletan aritzea”, nabarmendu du Filgie Claveriek, Dantzaz-eko zuzendariak. Ez da, ordea, kasu bakarra izan, konpainia honetatik igarotako 40 gazteetatik 25 dantzari profesionalak direlako dagoeneko.
‘Mintzo’-n ikusiko dituzunak ere etorkizuneko izarrak izan daitezke.