Baxua, bateria, bi gitarra, lau jantzi eta beste horrenbeste maskara aski dira Straitjackets surf musikako eta rock and roll instrumentaleko maisuak direla frogatzeko. Nashvilleko taldea bi genero horien erakusgarri eta eredutzat jotzen da ia-ia aho batez, eta horrela frogatu dute 1988tik hona egin dituzten ehunka kontzertutan eta hamabost albumetan. 'Jet set' dugu haien azken lana, sci-fi soinuak, aire jamaikarra eta bestelako oihartzun exotikoagoak tartekatzen dituen grabazioa.

Aitortutako harrokeria guztiak bazterrean utzita, duela bost urte Kaiser George-rekin batera egin zuten bezalaxe, oraingo bira honetan, Eddie Angel eta Daddy-O Grande buru dituzten surf-rocker hauek eskaintza handitu eta Big Sandy rockabillyaren ahotsa eta Pontani Sisters-en burlesque ukitua gaineratu dizkiete beren ohiko doinuei. Dantzari horiek swing eta bestelako dantzen oinarrizko ezaupideak eskaintzen dituzte musika bikainaz betetako ikuskizun jostagarri eta ikusgarri honetan.