Guggenheim Bilbao Museoak 2026ko udaberrian berriro aktibatuko du Art & Music zikloa, museoko Atrioa zuzeneko musikarako eta esperientzia artistiko partekatuetarako espazio paregabe bihurtzen duen proposamena. Formatu berezi honek diziplinen arteko loturak bilatzen ditu, soinuak, arkitekturak eta arte garaikideak elkar elikatzen duten esperientzia intimo eta errepikaezinak eskainiz. Beste behin ere, Kutxabanken babesari esker egingo da programa, eta Last Tour izango da musika-programazioaren arduraduna.

Edizio honetako egitarauak hiru begirada oso desberdin biltzen ditu, baina guztiek dute nortasun artistiko sendoa. Zikloa martxoaren 14an irekiko du pablopablo-ren emanaldiak. Madrildar artistak Canciones En Mi diskoa aurkeztuko du, sinpletasunaren edertasuna eta gitarraren indar emozionala ardatz dituen lana. Bere zuzenekoak formatu zehatz eta hurbilean garatzen dira, ñabardurez betetako kantuak nabarmenduz.

Apirilaren 11n Tinariwen igoko da Atrioaren oholtzara. Desert bluesaren aitzindari eta tuareg herriaren ahots esanguratsuenetako bat den taldeak bere musika hipnotikoa ekarriko du Bilbora, erritmoen, gitarra elektrikoen eta erresistentziaren poesiaren bidez, antzinakoa eta garaikidea uztartzen dituen soinu-bidaia batean.

Zikloa ixteko, maiatzaren 9an, Lewis OfMan izango da protagonista. Frantziako pop elektronikoaren erreferenteetako batek bere unibertso sofistikatu eta emozionala aurkeztuko du, dantzarako gonbidapena eta malenkonia orekatzen dituen zuzeneko magnetiko batean.

Art & Music programak, gainera, esperientzia zabala eskaintzen du: bertaratuek museoko erakusketak talde txikitan bisitatu ahal izango dituzte 20:30etik aurrera, kontzertuak 22:00etan hasi aurretik, eta Atrioan bertan dagoen taberna-zerbitzuaz gozatu. Sarrerak abenduaren 18tik aurrera egongo dira eskuragarri Museoaren Lagunentzat, eta abenduaren 19tik aurrera publiko orokorrarentzat, Guggenheim Bilbao Museoa berriro ere diziplinen arteko elkarrizketarako gune nagusi gisa kokatuz.